Iran Ba Za Ta Taɓa Komawa Zuwa Zamanin da Maƙiya Ke Ƙaunar Ta Koma Ba

A cewar Kamfanin Dillancin Labaran Hauza, Ayatullah Sayyid Mujtaba Husaini Khamene'i, Jagoran Juyin Juya Halin Musulunci kuma Babban Kwamandan Rundunar Sojin Iran, ya bayyana hakan ne a cikin saƙonsa na tunawa da zagayowar kwanakin farko na yaƙin tilas na farko da kuma kwanakin Allah na gwagwarmayar shekaru takwas da al’ummar Iran ta yi tare da ɗorewar tsayin daka.

A cikin saƙon, Jagoran ya yi nuni da ƙoƙarin masu mulkin danniya na mayar da Iran zuwa zamanin koma-baya, na “ƙasƙanci da wulaƙanci”, dogaro da wasu da kuma mummunan suna, ta hanyar tilasta mata yaƙi a cikin shekaru goma na farko bayan Juyin Juya Halin Musulunci. Ya jaddada cewa, duk da irin waɗannan ƙoƙari masu yawa, tsarin Musulunci ya tashi da ƙarfi da armashi fiye da da, da murya mafi ƙarfi da kuma tashi sama fiye da da, kamar tsuntsun Phoenix da ya sake tashi daga toka.

Ya bayyana cewa wannan ya zama wata ɗabi’a da ta ci gaba a cikin tsarin Musulunci a duk wasu abubuwan da maƙiya suka ƙirƙiro daga baya. Ya ce a yau, wannan “Phoenix” ya yi girma ƙwarai sakamakon matsin lambar maƙiya, musamman yaƙe-yaƙen tilas guda biyu na baya-bayan nan, har ta kai ga inuwarsa ta mamaye ƙasashen maƙiya.

Jagoran Juyin Juya Halin Musulunci ya kuma karrama cikar shekara ta biyu da shahadar gwarzon jagoran Larabawa kuma babban ramzin Gwagwarmayar Ƙetare Ƙasa, Sayyid Hasan Nasrullah, tare da yabon tsayin daka da irin gwagwarmayar Ashura da Sheikh Na’im Qasim, babban sakataren Hizbullah na Lebanon, da mayakan Hizbullah suka nuna.

Ya bayyana cewa: “Waɗannan kwanakin da Lebanon ke ciki, kwanaki ne na musamman kuma masu alfahari ga dukkan 'yan gwagwarmaya; sannan kwanaki ne na wulaƙanci kuma a ƙarshe abin kunya ga waɗanda suka sa ido cikin fata ga alkawuran ƙarya na masu mulkin danniya da masu yi musu fatan sharri, a lokacin da suke fuskantar maƙiya 'yan Sahayoniya.”

Ga fassarar cikakken Saƙon Jagoran Juyin Juya Halin Musulunci

Da sunan Allah, Mai rahama, Mai jin ƙai.

“Lalle ne, Mun aika Musa da ayoyinMu, cewa: ‘Ka fitar da mutanenka daga duhu zuwa haske, kuma ka tunasar da su kwanakin Allah.’”

Farkon kwanakin watan Mehr suna tunatar da mu kwanakin Allah da kuma wannan gagarumar gwagwarmaya mai ɗorewa ta shekaru takwas da al’ummar Iran ta yi cikin ƙarfin hali a lokacin yaƙin tilas na farko.

A wancan lokaci, hasken rana mai ɗumi na Juyin Juya Halin Musulunci ya bazu a faɗin ƙasar Iran, yana yaɗa wani yanayi mai daɗi na haɗin kan ƙasa da biyayya ga tafarki da koyarwar Musulunci na juyin juya hali. Wannan ya sa ƙanƙarar mulkin danniya da tsoho da sabon mulkin mallaka suka fara narkewa.

A wancan lokaci, wasu daga cikin mutanen Iran suna tunawa da abubuwan da suka faru shekaru fiye da ashirin da suka gabata, dangane da munanan manufofin masu mulkin mallaka da abubuwan da suka shafi mayar da masana’antar man fetur ta ƙasar mallakin jama’a da kuma juyin mulkin da Amurka ta shirya.

Wasu kuma sun ji labarin waɗannan abubuwa, yayin da da dama daga cikinsu a zahiri suka fahimci irin illar da mamayar baƙi kan harkokin ƙasar ta jawo mata. Amma kwanakin da suka gabaci wannan lokaci sun kasance kwanaki masu cike da duhu, inda jakadun ƙasashe masu girman kai suke isar da umarni da hani ga Shah na Iran, shi kuma ya aiwatar da su da son rai ko ba tare da son rai ba. Har sai da babban Juyin Juya Halin al’ummar Iran ƙarƙashin jagorancin Imam Khumaini (RA) ya kawo ƙarshen wannan yanayi.

Wancan zamanin mai cike da duhu ya sauya, sakamakon wannan juyin juya hali, zuwa kwanaki masu haske na kafa Jamhuriyar Musulunci ta Iran. Wannan lamari ya yi wa masu mulkin danniya, waɗanda suka sanya idonsu kan dukiyar wannan ƙasa, kuma suka shafe shekaru suna aikata nau’o’in zalunci ga al’ummarta domin su mallake ta, matuƙar zafi.

Saboda haka, tun daga wannan lokaci suka mayar da dukkan ƙoƙarinsu wajen karkatar da kwararar kogin al’ummar da ta yi juyin juya hali zuwa tsohuwar hanya. Yaƙin tilas na farko shi ne mafi muhimmancin matakin da suka ɗauka a cikin shekaru goma na farko na Jamhuriyar Musulunci mai albarka.

Daga cikin wutar wannan yaƙi, wanda jam’iyyar Ba’ath mai adawa da jama’a ta kunna bisa tunanin cewa za a kammala yaƙin cikin ƴan kwanaki kuma a samu nasara cikin sauƙi, tsarin Musulunci ya tashi kamar tsuntsun Phoenix, cikin ƙarfi da armashi fiye da da, da murya mafi ƙarfi da kuma tashi sama fiye da baya. Wannan hali ya ci gaba da kasancewa cikin tsarin Musulunci a sauran abubuwan da maƙiya suka ƙirƙiro daga baya.

Wancan zamanin da maƙiyan wannan al’umma suka ɗora barorinsu a kanta, suna aiwatar da wani sabon salo na mulkin mallaka, albarkacin Juyin Juya Hali da ɗaga tutar Musulunci da jihadi a cikin yaƙin tilas, ya koma zuwa zamanin alfahari. Ko da bayan shekaru 38 da kawo ƙarshen wannan yaƙi, idan aka yi nazari kan kowane ɗan ƙaramin lamari na wancan lokaci da kuma gaskiyar labaran waɗanda suka tsira daga cikinsa, ana ganin mutane abin koyi, waɗanda kowannensu ya kasance darasi na ibada, jarumtaka, juriya, kyawawan ɗabi’u da mutuntaka, kamar taurari masu haske a tarihin ƙasar.

Wancan zamanin da, a farkon hare-haren mabiyan tsarin mulkin danniya, ƙasar Iran ta gaji hannuwa wofi daga tsarin mulkin Ɗagutu wajen kare kanta daga barazana iri-iri. Amma albarkacin tsayawa kan gaskiya da taimakon Allah, yau an kai wani matsayi da masu mulkin danniya da kansu, ba mabiyansu ba, suke neman mafaka daga hare-haren mayaƙan Musulunci tare da roƙon a dakatar da yaƙi.

Zamanin da suke son mayar da ƙasarmu cikinsa shi ne zamanin koma-baya, wulaƙanci, dogaro da wasu da kuma mummunan matsayin Iran a duniyar Musulunci. Amma zamanin da muke ciki cike yake da ci gaba, ɗaukaka, ’yancin kai da matsayi mai girma a duniyar Musulunci, har ma da duniya baki ɗaya.

A yau wasu suna ɗaukar Iran a matsayin ƙasa ta huɗu mafi ƙarfi a duniya. Tabbas, suna faɗin haka ne bisa lissafin duniya. Amma bisa lissafin Allah, ƙasar da take ɗaukar kanta a matsayin mai alaƙa da Ahlul Baiti tsarkaka, tsira da amincin Allah su tabbata a gare su, kuma mafi yawan mutanenta suna da ƙauna ga waɗannan manyan mutane tare da rashin tsoron tsayawa kan gaskiya, ita ce mafi ƙarfi a duniya.

A wancan lokaci, tekuna biyu na kudancin Iran sun kasance filin wasan sojojin maƙiya. Amma a yau, sakamakon munanan hare-haren da jaruman mayaƙa da masu kare mashigar Hormuz suka kai musu, ba sa iya wucewa daga Tekun Larabawa. Duk lokacin da suka yi ƙoƙarin ɗaukar wannan kasada, sun jawo wa kansu illa. Kuma ba da daɗewa ba Tekun Larabawa ma zai kuɓuta daga gare su.

Akwai wani zamani da masu mulkin danniya suka yi amfani da yaƙin tunani da haifar da tsoro wajen mayar da titunan babban birni babu mutane, sannan suka ƙaddamar da juyin mulki kan neman ’yancin kan wannan al’umma, daga baya kuma suka kwashe dukiyar ƙasar tsawon shekaru 25.

Amma a kwanakin nan, tsawon watanni bakwai, ’yan ƙasar Iran sun cika filaye da tituna a faɗin ƙasar da kasancewarsu cikin ƙwazo da alhakin da ke kansu, domin ƙarfafa zukatan mayaƙan Musulunci da jefa maƙiyi cikin tsoro.

Haka kuma, sama da ’yan Iran miliyan 30 sun bayyana shirinsu na sadaukar da kansu. Lokacin da aka sake buƙatar tsara wannan kasancewa da kuma tabbatar da halartar su, sama da mutane 500,000 sun cika adadin da ake buƙata cikin mintuna 100 na farko kawai.

A halin yanzu, a duk faɗin Jamhuriyar Musulunci ta Iran, wadda ta ƙunshi al’ummar Iran daga ƙabilu daban-daban, akwai sanarwar shirye-shirye iri-iri, musamman shirye-shiryen ɗaukar makami, domin samar da wani fagen gwagwarmaya da zai ba su suna mai kyau, yayin da maƙiyansu za su samu abin kunya.

Akwai wani zamani da ake gane jarumtar mutanen wannan ƙasa ne ta hanyar mazaje. Amma a yau muna cikin wani lokaci da mata a wasu fannonin kasancewa cikin jarumta suke fin maza wajen nuna ƙarfin hali.

Akwai wani zamani da maƙiyi yake ƙoƙarin ci gaba da raunana tushen zamantakewar tsarin Musulunci. Amma a yau, al’umma daga sassa daban-daban, duk da bambance-bambancen da ke tsakaninsu, suna dagewa wajen kare matsayinsu na gaskiya, ciki har da kare mashigar Hormuz mai albarka.

Za a iya ci gaba da faɗaɗa wannan kwatanci tsakanin kwanakin baya da na yau. Amma a taƙaice, ni a matsayina na mai yi wa al’ummar Iran hidima, ina sanar da cewa wancan zamanin da maƙiyinmu yake fatan mu koma cikinsa ya wuce, kuma ba zai sake maimaituwa ba.

Tabbas, cikin ciwo da baƙin ciki, dole ne in tunatar da cewa a wannan lokaci muna matuƙar jin rashin Imam Khumaini mai girma da kuma Shahid Sayyid Ali Khamene'i mai girma, Allah ya ɗaukaka matsayinsu, waɗanda ɗaukakar ƙasar a yau tana da alaƙa da jagorancin da suka yi.

Amma albarkacin taskar daraja da suka bari ta hanyar ayyukansu da kalamansu masu haske da shiryarwa ga mabiyansu, kwanakin da ke gaba za su kasance mafi ɗaukaka fiye da waɗannan kwanakin. Domin wannan tsuntsun Phoenix da ya fito daga tarin wutar yaƙin tilas na farko, sakamakon matsin lambar maƙiya, musamman yaƙe-yaƙen tilas guda biyu na baya-bayan nan, ya yi girma ƙwarai har inuwar tashinsa ta kai kan ƙasashen maƙiya.

A wannan lokaci, ya dace sosai, saboda cikar shekara ta biyu da shahadar gwarzon jagoran Larabawa kuma babban alamar gwagwarmaya, Shahid Sayyid Hasan Nasrullah, Allah ya tsarkake ruhinsa, mu tuna da shi.

Shi mutum ne mai kyakkyawar niyya ta gaskiya ga al’ummarsa da tafarkinsa. Hudubarsa masu gaskiya da daɗin sauraro da kuma ayyukansa na jaruntaka sun ƙarfafa zukatan mutanensa, har ma da masu ’yanci a duniya.

Shi ne wanda ya ɗaukaka sunan Lebanon, ƙaramar ƙasa wadda tsawon shekaru ta kasance filin baya na wasu manyan ƙasashe, zuwa wani matsayi mai girma. Shi ne wanda nasara da taimakon Allah suka kasance abokan tafiyarsa na dindindin. Kuma babu shakka, a tsawon tarihin yankin Sham har zuwa yau, bayan Annabawa da Wasiyyansu, babu wani mutum mai irin wannan girma da ya bayyana a wannan tsohuwar ƙasa.

A yau kuma, tutarsa mai cike da ɗaukaka tana hannun Sheikh Na’im Qasim, Allah Ya kiyaye shi, wanda cikin jarumtaka yake ci gaba da tafiyar da tafarkinsa a sahun gaba na Hizbullah, cikin tsari mai ƙarfi da ruhin Ashura.

Waɗannan kwanakin Lebanon, a gaban tarihi, har ma tun daga yanzu, kwanaki ne na musamman da cike da alfahari ga shi da dukkan masu gwagwarmaya. Haka kuma kwanaki ne na wulaƙanci da kuma a ƙarshe abin kunya ga waɗanda suke yarda da maƙiya 'yan Sahayoniya suna ɗora fata kan alkawuran ƙarya na masu mulkin danniya da masu yi musu fatan sharri.

Waɗannan mutane, sabanin Sayyid Shahidul muƙawama, Sayyid Hashim Safiuddin da kuma mayaƙan gwagwarmaya na yanzu, waɗanda za su ci gaba da haskakawa kamar taurari masu haske a cikin tarihi kuma su kasance jagora ga masu neman hanya a lokacin ruɗani, za a binne su kuma a manta da su cikin gaggawa a farkon shafukan tarihin da za a buɗe.

Idan har aka ambace su a nan gaba, za su zama abin tunawa da mummunan hali, rashin basira wajen tafiyar da al’amura, har ma wataƙila cin amana.

A ƙarshe, ina fatan da ci gaba da falalar Allah da kuma addu’a ta musamman daga Shugabanmu, Allah Ya gaggauta bayyanarsa, tare da sadaukar da rayukanmu gare shi, al’ummar Iran da dukkan abokan gwagwarmaya ba za su fuskanci komai ba face taimakon Allah, nasara da ɗaukaka; yayin da maƙiyansu ba za su fuskanci komai ba face shan kaye da wulaƙanci, da falalar Allah da karamcinsa.

Sayyid Mujtaba Husaini Khamene'i

6 Mehr 1405 (28 Satumba 2026)